內地潮興「玩」核桃 一孖值幾萬

【明報專訊】核桃大家就食得多，但唔知有冇聽講過內地最近時興「文玩核桃」？原來喺古玩界入面，核桃都算一種收藏品，當經過長時間喺手入面把玩，色澤就會慢慢變紅，甚至呈現好似瑪瑙嘅色澤同手感，呢種「靚核桃」就喺成為古玩商人追逐嘅對象，一對大細、外形相似嘅核桃，叫價可能要幾萬蚊人仔，認真唔講得笑。


據內地行家話，近年因為刻意炒作，仲多咗一款刺激玩法，就係所謂「賭青皮」，同玉石行業中嘅賭石一樣玩法。


「賭青皮」 剝開定輸贏

買家只要畀幾蚊至幾百蚊人仔，就有一大堆喺樹上摘落嚟，仲連着皮肉嘅青皮核桃果實任君選擇，畀錢之後就可以動手剝開果皮（圖），如果挑選出嚟嘅兩粒核桃「品相好」，大細形狀都近似，就算「賭贏」，可能以高至幾千，甚至幾萬蚊價錢賣番出去。