許廷鏗入潮屬社團賀國慶

【明報專訊】潮州人慶祝國慶，本來年年搞，不過今年就有新亮點，因為歌手許廷鏗（Alfred）今年第一年加入潮屬各界慶祝國慶嘅籌備委員會。大家可能以為，唔通廷鏗屋企人早就係籌委會委員，所以佢先「接手」？廷鏗澄清，原來佢父母同籌委會係無關嘅，今次只係堂兄弟介紹先至入會。


堂兄弟介紹入會 未安排獻唱

早前RubberBand參與巨蛋音樂節，受到部分人批評，唔知廷鏗又怕唔怕畀人話佢加入「紅色」國慶籌備委員會呢？廷鏗話，自己想法好簡單，身為潮州人，自然支持潮州人嘅活動，無諗過有政治上嘅嘢，亦唔想畀人標籤。噚日呢個委員會舉行全體會議，廷鏗亦有去開會。


雖然暫時未有安排廷鏗唱歌，不過佢話如果有需要都無問題。佢透露，今次入會源於一次回鄉之旅，當時有個堂兄弟叫佢入會，不過已經唔記得對方喺籌委會做咩職務。至於廷鏗今次自己一個「膽粗粗」過嚟，佢就話暫時無乜工作，可能籌委會係見佢之前番潮州，認為佢可以用知名度推廣家鄉，先叫佢入會喎！