黃洋達： 默站抗議好危險

【明報專訊】特首梁振英去完天水圍，星期日會到觀塘功樂官立中學同市民見面，今次同佢一齊落區嘅有食物及衛生局長高永文、環境局長黃錦星。觀塘民政事務處諮詢服務中心當日朝早9點會以先到先得形式派籌。


CY周日落觀塘 出動更多CID

Emily聽聞，警方噚日就為咗今次特首落區開briefing，評估過觀塘應該無新界咁多江湖人物，會出動200幾名警員，同天水圍論壇差唔多，但會出多啲CID以防萬一，原因係確保萬一要拉人，都有足夠人手。示威區會擺喺會場對面馬路，當CY車隊行過時，會用鐵馬分隔馬路同示威者。


社民連發起「默站」，以沉默站立抗議，民主黨同公民黨決定參加，據講公民黨黨魁梁家傑當日會帶隊到場默站，但唔打算搵人排隊入場。熱血公民就唔同意，黃洋達喺facebook批評，叫示威者「打不還手、罵不還口」，係陷參與者於危險境地！「不是叫你以暴易暴，只是用常識面對事態」，話如果咁樣做，大家會喺沉默中死亡。