民主黨黨慶 CY茂波克儉無份

【明報專訊】唔經唔覺民主黨成立19年，計劃10月4日喺尖沙嘴酒家搞生日會，佢哋計劃邀請各司局高官出席，但唔請特首梁振英（CY）、發展局長陳茂波同埋教育局長吳克儉，因為民主黨成日叫呢3人落台，無理由仲請佢哋嚟賀生日。


其實民主黨以前有請CY出席黨慶，好似2010年，CY仲以5萬蚊投得司徒華嘅墨寶，贊助民主黨經費。


講開CY，佢都搞緊飯局見客，下個月又搞兩輪飯局，同人傾政改，首場12號嘅飯局，除咗佔中發起人之一陳健民教授，以及反佔中嘅「幫港出聲」鄭赤琰教授外，仲邀請埋港大法院學院院長陳文敏、工業總會劉展灝、公務局事務局前局長王永平、香港當代文化中心總監黃英琦、城大公共及社會行政學系教授葉健民，以及有真普聯背景嘅公民黨楊岳橋等。


CY邀飯局 馬嶽未決定

中大政治與行政學系副教授馬嶽噚日收到特首辦邀請電話，仍猶豫緊去唔去，因為覺得咁大班人一齊食飯，好難跟CY討論到政改，但如果去，都係想聲援一下陳健民，費事陳教授喺飯局中被反佔中嘅出席者砌！

陳健民：慣辯論 唔驚畀人圍

陳健民就話唔擔心同反佔中嘅鄭赤琰教授同枱食飯，亦唔擔心畀人砌，反正佢哋已經習慣被大群反佔中嘅人圍住嚟辯論。佢話CY邀請，諗唔到理由唔去。早前先鬧佔中嘅CY突然好客，佢唔知道呢次CY係想玩拖延策略，定係想釋出善意，而陳教授當然最想CY係後者。


至於第二場17號嘅飯局，暫定邀請名單有民協廖成利及工黨黃偉國等。