熊貓守護使 環球推保育

【明報專訊】繼澳洲「絕世筍工」大堡礁保育員之後，Emily再有筍工介紹畀大家，呢份就係「熊貓守護使」——既有得同熊貓親密接觸，仲可以環遊世界，只須2個月培訓，同埋2個月環球探訪熊貓，就有2萬美元（15.5萬港元）落袋，何樂而不為？噚日就有3位熊貓守護使嚟咗海洋公園，同大家分享保護理念。


由成都大熊貓繁育研究基地舉辦嘅「全球熊貓守護之旅」，由前年開始，每年全球選拔數名熊貓守護使，任期一年。佢哋要接受2個月培訓，仲要學習熊貓嘅知識、去山區觀察野生熊貓等，大把機會同熊貓親密接觸。培訓之後，即刻展開全球之旅，去15個國家及地區探訪大熊貓，同埋向公眾宣傳保護動物理念。


選拔要扮熊貓餵食磅重

不過，要成為熊貓守護使都唔簡單，除咗要對生態有認識，仲要考佢哋扮熊貓、幫熊貓磅重同埋餵食。競爭對手都唔少，好似舊年就有116萬人報名參加，但只有3個名額。