光榮號訪港 海運有得睇

【明報專訊】繼早前全球最古老郵輪「忠僕號」同最大古帆船「謝多夫號」訪港，有45年歷史嘅哥倫比亞仿古帆船「光榮號」（A.R.C. Gloria）大駕光臨維港。佢今次會停泊海運碼頭，噚日至下禮拜三（28/8）市民可登船參觀，但要先喺海運大廈詢問處領取登船入場券，每人限4張，每節參觀時間20分鐘。


今次係「光榮號」繼1997年環球之旅途經香港，首次正式到訪香港。佢喺今年5月3日開始展開其第73次、為期7個月嘅旅程，預定走訪全球12個港口，包括新加坡、美國、巴拿馬等，預計全程2萬海里。呢艘仿古帆船1967年12月下水，充滿哥倫比亞色彩，係世界上最大三艘航海教練船之一，排水量1300噸，咁多年來四圍宣揚和平同友好信息。