澳洲大選 中環都有廣告

【明報專訊】澳洲國會大選喺9月7日舉行，家戰情緊湊，各黨派都努力去爭取選票，包括居海外選民嘅一票。立法會議員莫乃光（Charles）就話驚見澳洲工黨喺舊天星碼頭停車場外牆租用咗選舉廣告，廣告上有工黨主席陸克文嘅大頭相。Charles就好奇怪咁話，「香港這麼多澳洲選民？」


莫乃光：港多澳選民？

社民連副主席吳文遠就將呢幅選舉廣告嘅相片加工，佢話澳洲工黨喺香港賣廣告咁有霸氣，而自己都唔輸蝕，兩年前就已經喺巴黎賣過區選廣告，仲有相為證喎；不過，佢補充話，其實佢當時只係將區選嘅選舉海報，帶埋去巴黎鐵塔下留影啫。


喺港島出選過立法會嘅吳文遠話，喺中環賣咁大幅嘅廣告，成本可能以十萬元計，佢哋呢啲細小政團，真係負擔唔起，喺街頭掛多幾幅宣傳banner實際啲！