民建聯開van仔落區 教報稅睇中醫樣樣齊

【明報專訊】第一大黨民建聯會員超過2萬，專業人士都唔少，單係佢哋轄下嘅專業事務委員會就有成700幾人，委員會早前換屆後打算銳意發展，其中一項重要工作係設立流動辦事處，服務可以話係升級專業版，打算提供義務法律諮詢、中醫義診、物理治理，甚至做免費稅務諮詢，教人點填報稅表。


仲有免費法律諮詢

民建聯副主席張國鈞話，早前該黨買咗一架6人van，經過合法改裝，車上嘅櫈可以郁動，方便做流動辦事處，希望9月可以啟用，仲會同各支部傾吓去邊區服務。連物理治療、中醫都可以免費服務，相信無乜幾多政黨可以做到。除咗流動服務，佢哋亦會了解唔同社會群組有乜需要，亦會喺樓宇管理、法律問題等方面入手研究。


立法會議員陳恒鑌話，希望專業事務委員會加強同立法會黨團合作，就住社會政策畀多啲專業界意見。


講開又講，該黨曾喺立法會講粗口嘅大律師馬恩國，以前係委員，但今年無參加。