林和立叫特首學瓜爸辯才

【明報專訊】民主黨主席劉慧卿噚日主持嘅錄影節目《議會內外》，請咗中國問題評論員林和立做嘉賓，林和立喺節目內大談習近平及薄熙來案，佢仲叫特首梁振英（CY）同發展局長陳茂波學吓薄熙來嘅辯才，因為相比起CY同茂波嘅「人肉錄音機」，「瓜爸」嘅口才高佢哋幾個馬位。不過，卿姐笑住咁話香港人唔想見到佢哋狡辯，只想佢哋從實招來。


卿姐：唔想見狡辯

林和立之前寫咗篇文話有陰謀論指習近平打算喺香港搞文革式批鬥，但佢噚日就話香港人有高學識水平，而且大部分人追求穩定，所以相信呢件事係子虛烏有。但佢覺得，如果民情再惡化落去，就唔排除有Plan B，皆因當年董伯伯都係2003年大遊行約兩年後先腳痛落台。


另外，林和立覺得薄熙來案審訊同當年審四人幫「不相伯仲」，佢就估刑期最多20年，因為根據中共高層一個不明文規定，大家都唔會重罰「紅二代」，皆因可能「他朝君體也相同」。