區會小桃園餞別警司

【明報專訊】舊年「小桃園江湖飯局」事件引起社會極大關注，Emily收到風，話元朗警區指揮官鄧炳強噚晚都現身流浮山小桃園！Emily即刻撲入元朗看個究竟，原來係元朗一班區議員、滅罪委員會成員同政府官員喺小桃園設餞別宴歡送鄧炳強，因為鄧sir獲警隊保送去有「高層搖籃」之稱嘅英國國防大學深造。


「小桃園」聞名，全因去年特首選舉期間，屬梁營嘅羅范椒芬、劉夢熊等人前赴流浮山出席飯局，據稱席間有江湖人物現身，結果惹來「黑金政治」指控，搞到羅范要去廉署求助以示清白。


「無嘢唔見得光」 叫攝記影相

據知，噚晚嘅飯局由區議會主辦，係一個區議會同滅罪委員會嘅社交活動。小桃園雖然好敏感，不過主持飯局嘅元朗區議會主席梁志祥就話區內人士習慣咗喺嗰度食飯，佢話飯局都係吹吓水，大家一齊風花雪月，無咩特別。梁志祥仲好客氣咁開大門叫攝記哥哥影相，因為無嘢唔見得光。


警界中人：應屬酬賓活動

佢哋噚晚食咗9個餸，有蝦、鮑魚、炸子雞同石頭魚湯等，梁志祥強調今次參加飯局嘅人都要自己夾番錢，每人大約500蚊。據警界中人話，警方一般都唔會去有江湖背景人物參與嘅活動，亦避免去佢哋經常聚集嘅地方，至於噚晚嘅活動，應屬於區議會酬賓活動。