大專生最唔捱得鬧

【明報專訊】為內地貧困農村起橋搭路嘅「無止橋慈善基金」，每年都會搞慈善步行籌款，今年搵咗商台前管理層黃永嘅社企「言論自由行」幫手，仲委託咗浸大政治及國際關係學系研究員做調查，發現香港大專學生原來「最唔捱得鬧」，其次係「最唔捱得悶」，而如果要為「捱唔捱得」評分，滿分100嘅話，大學生自評有56.3分，但係其他人就只畀大學生46.9分。


呢個調查用電話隨機訪問咗1000個居港者，當中有11.8%係18至22歲大專生。調查發現，如果將答「非常唔捱得」受訪者嘅百分比，減「非常捱得」嘅百分比，最大差異係「捱得鬧」，相差56.1百分比。相反，大專生「最捱得」係「捱眼瞓」同「捱得熱」，相差只約11個百分點。


「無止橋」11月搞搬磚籌款

講開捱得，今年6月就有3個大學生為「無止橋」籌款，用43日踩單車走遍歐洲9國，籌得2萬元善款。無止橋今年會喺11月17日搞步行籌款，比較特別係每個參加者都要搬一嚿磚同行，由荃灣公園行去深井。新世界發展執行董事紀文鳳就同Emily講，因為政務司長林鄭月娥問只有一間大學喺港島，點解今次籌款唔試吓喺九龍搞，所以今年就由港島改去新界搞。活動10月25日截止報名，可瀏覽無止橋網站。