周一嶽情花初開在港大

【明報專訊】新學年將至，港大噚日舉行新生入學禮，有明年卸任嘅校長徐立之同新任醫學院院長梁卓偉主持，擔任主禮嘉賓嘅平機會主席周一嶽搶盡風頭，身為港大校友嘅佢致辭時分享喺港大嘅青葱歲月，完全係「句句有驚喜」，有「官場技安」之稱嘅佢，仲講到希望將來有機會可以返母校唱歌，即時搞到台下一眾學生歡呼喝采！

想返母校唱歌仔

56歲嘅周一嶽一開始就話當年出席入學禮，其實完全無聽台上講者講乜，而由於佢中學讀男校，所以好誠實咁話自己一入到港大就畀唔少女同學吸引住，仲成功「開齋」得到初戀（雖然最後散咗）。佢仲話自己大學時期係「波牛」，有一次畀教授上堂當眾質問「Mr Chow, no reports today, right?」點之佢好誠實照直答當日晏晝有波踢，所以無功課交，搞到教授無符，呆咗5秒後淨係答咗句「I see」。周一嶽家回望，慶幸當年無講大話，借佢個「反面教材」勉勵台下港大學生要自律，面對矛盾時要勇於承擔。