悼維園許伯 「主場」辦追思會

【明報專訊】香港電台《城市論壇》其中一個icon人物、20年內風雨不改去撐場嘅「維園阿伯」許金池，因不敵肺癌、直腸癌、淋巴癌、脊椎癌等頑疾，周一與世長辭。許伯雖然唔算係乜嘢大人物，但喺維園受到唔少人尊重，佢嘅親友同民建聯黨友，都有意喺9月中喺許伯嘅「主場」辦一個追思會，延續許伯嘅論政夢。


謝志峰：斯文嘅維園阿伯

八十高齡嘅許伯，1992年起出席城市論壇，佢喺今年3月節目中攞住咪自爆患咗末期癌症，預告自己唔知可以講多幾多次，向所有支持者「致萬二分謝意」。雖然如此，抱病中嘅許伯仍然踏足維園，而節目主持人謝志峰話，約兩個月前先見過許伯，當時佢精神尚可，未料突然離去。


謝志峰話許伯係出席論壇者中比較斯文嘅人，「與一般粗口爛舌、語言暴力同肢體暴力嘅人有好大分別！」據許伯朋友講，許伯知道自己有病後雖然有睇醫生，但覺得難望治好，既然生死有命，抗拒接受化療。


曾鈺成譚耀宗曾探病

許伯係民建聯創黨黨員，成日去《城市論壇》嘅民建聯周浩鼎係佢後輩，周話許伯患病時，主席譚耀宗及前主席曾鈺成等人都有探佢，如果許伯親友提出悼念活動要求，民建聯一定配合。