香港麥當勞之父走了

【明報專訊】有「香港麥當勞之父」之稱嘅伍日照上周五過身，伍日照1975年將麥當勞帶嚟香港，喺銅鑼灣百德新街開咗第一間分店，至今香港已經有236間分店。麥當勞今日喺報章登悼辭（見A12），表示深切哀痛，又形容伍先生嘅貢獻非筆墨能盡表達，決定成立一個以伍日照為名嘅獎學金畀公司嘅年輕員工。


1975帶麥記來港

擁有博士學位嘅伍日照，當年原本係介紹朋友同麥當勞合作，點知朋友臨時甩底，佢就頂上，去美國受訓，洗廁所、捧餐全部都要做；1991年仲將麥當勞帶到深圳，1995年將經營權售回美國後退休，但仍擔任榮譽主席，醉心麥當勞叔叔之家嘅慈善工作。伍日照喺3年前、麥當勞來港35周年時接受本報專訪時話，難忘1983年港元對美金匯價大跌時堅持減價，生意好轉。近年麥當勞常被指靜靜雞加價，佢就巧妙咁話自己都用八達通畀錢，所以唔知價。