梁家傑聲演林肯講和平

【明報專訊】香港電台前排搞咗個「社區參與廣播服務試驗計劃」，原來公民黨嘅青年公民亦有申請，仲成功獲批，佢哋嚟緊會製作一個主題為世界和平嘅廣播劇，內容主要介紹印度聖雄甘地、美國前總統林肯同緬甸反對派領袖昂山素姬嘅故事，每集會有學者回應，講吓呢啲外國例子可以點樣應用喺香港。打頭炮嘅係黨魁梁家傑聲演林肯。


公民黨青年公民主席梁穎敏噚日同傳媒茶敘時話，今次廣播劇總共會做13集，暫落實嘅演員仲有由飛機師譚文豪聲演蔡元培，佢哋並正聯絡黨主席余若薇聲演昂山素姬，不過對方暫未應承。


建制派近月陸續展開一系列反佔領中環宣傳，批評佔中損害法治，公民黨嚟緊亦會加強宣傳佔中作反擊，展開「沒有公義 哪有法治」宣傳，下月去禮賓府出席禮賓府政改飯局嘅公民黨執委楊岳橋就話，到時可以帶啲單張畀特首睇吓。