愛港力「搭單」見教局副局

【明報專訊】喺唔同場合均竭力維護建制嘅「愛護香港力量」嘅陳淨心，噚日走咗入政府總部見教育局副局長楊潤雄，佢哋十幾個成員見完後立刻喺政府總部外面換番件「愛港力」戰衣，仲舉晒橫額，原來呢次係民建聯立法會議員梁志祥幫手「撮合」嘅。淨心話，會上建議楊副局喺公開試嘅科目入面剔走通識科，又要將中史列為初中必修科。


會面後即換愛港力戰衣

不過，教育局夜晚突然出稿話楊副局長答應立法會議員梁志祥邀請，同十幾名「家長」及「市民」會面。咁即係意味陳淨心只係搭單入去啫。身兼新界社團聯會會長嘅梁志祥，6月底被傳媒撞到同陳淨心食飯時拿拿臨「劃清界線」，話雙方只係第一次食飯。


教局﹕應邀同「家長」會面

梁志祥同Emily解釋，今次係同班「相熟」家長去表達對中史科嘅睇法，一直唔知道陳淨心有份，後來見到名單先知有佢，仲話「如果係愛港力約見，都唔知副局長會唔會見」。不過，梁志祥呢頭話熟悉班家長，嗰頭又話唔知當中邊啲係愛港力、邊啲唔係，即係點呢？