撐後生財爺想睇《狂舞派》

【明報專訊】政府今年都請咗20幾個大學生做實習生，其中兩個去咗幫財政司長曾俊華。財爺話覺得後生仔去政府實習，可以學識更全面咁分析唔同嘅公共事務，仲話希望遲啲可以抽時間睇《狂舞派》，欣賞一下年輕人嘅創意活力。唔知財爺睇完《狂舞派》之後，會喺戲中金句「為了＿＿，你可以去到幾盡」上面寫啲咩呢？


今年分別有一個喺港大讀管理與法學嘅男生Stewart，同一個喺美國主修心理學嘅女仔Becky去咗財爺辦公室實習，財爺覺得家嘅大學生可以試多啲本科以外嘅實習，了解社會唔同層面。佢話帶Becky落區時，Becky就聽咗唔少來自唔同階層嘅五花八門訴求同意見，而且明白咗要平衡唔同嘅聲音同考慮現實中嘅掣肘。財爺又話，佢後生喺美國讀書，無得做實習生，而係去做暑期工掙錢。


唔知係咪同後生仔多咗交流，財爺都話好想睇《狂舞派》，佢話無論係電影定其他方面，香港嘅未來都要靠一班充滿活力同希望嘅新面孔接棒。