陳家強做拍賣官

【明報專訊】平時負責收錢嘅財經事務及庫務局長陳家強，噚日應邀出席「鑽的」新車啟動禮。為咗慈善，佢粉墨登場做埋慈善拍賣會嘅「拍賣官」，為「鑽的」籌到17,888元。


自己人捐畀自己機構

專為坐輪椅人士提供的士服務嘅「鑽的」噚日慶祝新車落地，「鑽的」行政總裁梁淑儀話，近年營運成本大增，特別係維修費，所以拎咗一個由的士避震器改裝嘅坐枱燈「鑽燈」拍賣，話要搵錢幫補維修費咁話。社會創投慈善基金會顧問委員會主席夏佳理本來用8888元投得，但佢再捐出嚟畀人投多次，最後「鑽的」嘅董事會主席倪以理用9000投得，即係成場都係show，自己人捐錢畀自己機構，搞吓氣氛都好熱鬧。


另外，標準工時委員會主席梁智鴻同Emily講，委員會正全面蒐集各行各業嘅工時資料，希望可盡快諮詢市民。佢話，知道勞工人手短缺，但講到商會提出輸入外勞嘅話，就要小心考慮各方面，因為涉及本港工人嘅生活。