澳門立會青年參選賣誠意

【明報專訊】澳門立法會選舉將於今個月15號投票，今屆直選議席有14個，破紀錄有成20張名單參選，除咗大家熟悉嘅四太梁安琪、澳門民主派區錦新等名單，仲有一張名單係年輕人組成，就係18號嘅「超越行動」，由4個後生男仔組成，最大嘅都係28歲。


徒步澳門全城宣傳

佢哋嘅宣傳方式好年輕化，除咗喺facebook開專頁，青年團隊徒步行去澳門每個角落宣傳。4個後生仔參選，競選經費應該唔多，似乎佢哋都吸引到一班年輕人幫手，當中仲有美少女幫佢哋拎住好大個寫住18號嘅競選街牌周圍去，又有動畫政綱、設計明信片等。


佢哋嘅青年助選團亦喺facebook寫感受，有人話係被參選嘅4個後生仔誠意同熱情感動，所以親身支持；亦有人大讚有咁後生嘅澳門人關心政治，相信係澳門未來嘅希望咁話。