黃鴨北京變尖嘴雞

【明報專訊】潮流興變尖，明星塊面一個比一個尖，牙刷又話要尖，估唔到早排喺尖沙嘴海旁展出嘅黃色巨鴨，去到北京亦變尖。


話說巨鴨噚日游到北京豐台園博園亮相，亦係「正版」巨鴨首次喺內地展出，不過巨鴨落水無幾耐，唔少網民就話同香港版唔同，個嘴好尖同埋皺皮，好似變咗「黃雞仔」。曾製作台灣高雄黃鴨嘅專家就估計，巨鴨之所以「唔啱嘴形」，唔係因為打風吹扁，而係製作過程中縫錯咗，先搞到鴨嘴變雞嘴。


理應直縫 鴨嘴錯橫縫

北京巨鴨比香港嘅巨鴨更巨，高18米、長21米。有網民細心比較香港同北京巨鴨嘅嘴部縫合方法，發現香港巨鴨鴨嘴嘅縫線係打直縫，北京巨鴨係打橫縫。巨鴨之父Florentijn Hofman喺全球展出嘅巨鴨，都係用同一張圖製作，負責製作高雄巨鴨嘅大氣層事業有限公司總經理陳榮安就認為，北京巨鴨之所以走樣，應該係縫錯咗鴨嘴，先令鴨嘴變咗尖尖尖。


北京人少理 讚可愛過睇相

不過，北京市民似乎就唔多介意巨鴨變尖，有園博園義工就話，知道巨鴨喺香港展出時好受歡迎，但因為無機會到香港欣賞，所以噚日特別提早返工，希望先拍照留念。佢哋又話，現場見到巨鴨，覺得比睇報章嘅相更可愛，亦回憶起細個冲涼時有黃色小鴨陪伴嘅日子。有傳媒仲出動遙控直升機協助拍攝，但被園區保安勸阻。


黃色巨鴨喺北京會分兩階段展出，噚日至到今個月23號會在園博園展出，園博園入場費盛惠100元人民幣。9月26日至10月26日就會移師頣和園。