淨心偲嫣撐G.E.M.

【明報專訊】歌手鄧紫棋（G.E.M.）今年4月底接受訪問，用「嘩﹗使唔使呀？」回應有人叫特首梁振英落台，惹來熱議。雖然G.E.M.強調唔係分享政治立場，不過兩大愛國陣營「愛港力」同「香港家長聯會」噚日就一於少理，家長聯會會長李偲嫣（Leticia）仲喺facebook大讚G.E.M.，話要「支持G.E.M.，支持CY，支持愛港人士，就係咁簡單！」（圖）星屑醫生歐陽英傑（Jeff）形容，今次真係「死亡之吻」。


事緣Jeff喺自己專頁，上載咗Leticia撐G.E.M.嘅截圖，當中Leticia除撐G.E.M，仲批評《蘋果日報》刊出G.E.M.早前撐CY嘅訪問時「斷章取義」。無幾耐「愛港力」召集人陳淨心亦加入，話「香港需要正面的思想、動力和鼓勵」，將G.E.M.再次拖入「撐特首」風波。


G.E.Ｍ.用甘迺迪句總結

G.E.M.就喺facebook專頁澄清，話從來無喺訪問中表達支持或反對任何政治人物或派別，又話一直避談政治，為「減少之後嘅誤會」，仲引用美國前總統甘迺迪名句，「Ask not what your country can do for you, ask what you can do for your country.」總結當日觀點。