陪仔開學 阿基倫敦被搶袋

【明報專訊】民協馮檢基（阿基）都算黑仔，一心諗住陪囝囝Benny去英國開學，做吓「怪獸家長」照顧囝囝，結果無法自保，噚日去到倫敦一抵埗，同阿仔喺露天茶座食早餐，點知放喺身邊嘅手提袋瞬間被賊人強搶，賊人拔足狂奔，阿基父子欲追無從！阿基慨嘆，金錢事小，連證件都被搶走，就增添唔少麻煩，好唔開心！

阿基事後話估唔到呢種強搶袋事件會喺倫敦發生，呼籲到此旅遊嘅朋友加倍小心。佢已經報警同着手辦理證件，會努力收拾心情，同家人共聚充電，回港繼續為民打拼喎。


網友提議「放手」

講番今次旅程，阿基陪18歲嘅Benny開學，囝囝讀舞台設計課程，但阿基嘅網友就提議佢「放手」畀阿仔獨立，唔使做「怪獸家長」。


阿基就話，明白要放手畀阿仔行自己嘅路，而今次旅程佢都有掙扎，但佢除咗想爭取機會同囝囝聚聚，亦想順道去英國度假，回味一下當年隻身留學嘅片段。阿基話當年孭住背囊，右手提行李、左手抱古箏去留學，對佢嚟講呢段光陰係一次身體嘅苦練。