長白山考察團 田二少腳仔軟

【明報專訊】每年港區人大代表都有一次長途旅程，去內地省市考察，今年佢哋就去到東北三省，已結束行程返港。人大去嘅地方通常都好特別，今次就去睇東北亞投資貿易博覽會，又喺吉林坐6、7個鐘頭車去長白山天池，其中新民黨副主席田北辰就上載考察相片，仲話去到天池上嘅懸崖邊搞到腳都震埋。


葉國謙上天池 天氣難測

田二少話，長白山天池係武林勝地，雖然唔知去得嘅人係咪武功高強，但一定好大膽，因為崖邊只有一條粗繩做圍欄，大約得兩呎高，行埋少少都腳震，而懸崖距離下面嘅天池有300米，天池水深有300米，佢形容跌落去可說唔係九死一生，而係實死無生。


民建聯葉國謙亦同Emily分享咗今次考察嘅相片，佢哋上星期六去天池嘅，喺山腳時好好天，藍天白雲一覽無遺，點知上到山就勁大霧同落雨；難怪田二少都話長白山天氣就好似政治一樣，都係變幻莫測，一日之間都可以翻天覆地。