梁邀友好協進會飯敘

【明報專訊】特首梁振英今晚展開新一輪政改晚宴，但原來CY最近都飯局頻頻，好似聽晚佢就約咗香港友好協進會喺禮賓府飯敘，係CY上台以來首次。友好協進會主要由一班全國政協委員同港區人大代表組成，背景夠晒紅，會長戴德豐下周初率領30人領導團訪京，主席團成員劉漢銓話，今次CY無講到有特定議題，相信都係閒話家常。


董建華曾蔭權無約過

友好協進會上京前被CY接見，有政界人士分析，可能係CY想打定底表示友好，唔希望喺北京被畀人「篤背脊」。不過劉漢銓話，CY其實一早約過友好協進會喺8月中食飯，但後來因為打風取消，所以先約返聽晚食，同友好協進會領導即將訪京應無關喎。佢又話，以往前特首董建華同曾蔭權，都無請過友好協進會去禮實府食飯，CY請食飯都算少有。


至於訪京可能見全國政協席俞正聲等高級領導人，劉漢銓話，友好協進會上京前無開會，相信上京時都係「百花齊放」、各提意見。