區議員中秋教包糉？

【明報專訊】中秋節要食——糉？觀塘民建聯區議員潘進源早幾日搞咗個「親子包粽同樂日」，教人點樣包端午糉，之但係今年端午節假期係6月12日，隔咗咁耐先至教人包糉？Emily問過潘議員，佢解釋話包糯米雞都係包糉，同節日無關，佢呢幾日都會派月餅應節。


「海報冇話慶中秋」

有網民得知潘議員中秋教包糉活動後，惡搞將無綫重播緊嗰套《溏心風暴》嘅畫面同潘議員嘅活動宣傳海報貼埋一齊。畫面係講角色之一嘅至逸，喺法庭上講另一角色仁佳中風後神志不清，連端午節要食月餅定糉都分唔清。


不過，潘議員嘅解釋都冇錯，佢張海報都冇話係慶中秋活動。