新界鄉紳赴歐講丁權

【明報專訊】政府擴建堆填區大計仍未落實，主要由新界鄉紳組成嘅新界關注大聯盟下周會出發到歐洲，重點係考察海外先進嘅廢物處理系統，協助港府搵到處理都市廢物嘅長遠辦法咁話。不過大聯盟另有一個目的，就係到荷蘭阿姆斯特丹及英國倫敦探一班已移居當地嘅原居民，為佢哋開講座，講解佢哋嘅權益，例如居港權、丁權同如何處理在港財產等。Emily心諗，唔知會唔會引發原居民返港齊齊申請丁屋呢？


講番廢物處理，大聯盟發言人何君堯話，環境局應該參考外國經驗，睇吓有無更好嘅廢物處理方法，大聯盟嘅考察團會去睇吓先進垃圾處理科技，包括等離子氣化技術，呢個技術聽講係用極高溫將垃圾化為無害氣體同水分，唔會釋出致癌嘅二噁英。考察團返港後會向政府提交報告，何君堯話最好就唔使擴建堆填區同埋填海起焚化爐啦。