CY夜宴 袁國強上陣

【明報專訊】特首梁振英（CY）頻頻搞政改夜宴，下一次會喺9月17日（下周二），但有別於本周四晚嗰餐，下周二嘅飯局無咗政務司長林鄭月娥，改為律政司長袁國強出席。政改涉及好多法律程序同《基本法》，袁國強今次走唔甩喇。至於林太，早前有報道話港府有意避免佢沾手政改，以免拖累佢嘅民望，但有政府中人話，林太喺政改問題上點都應該要參與，好難置身事外，所以CY前晚都請佢一齊食飯，參與政改討論。


何喜華要務在身無應邀

講番9．17飯局，今次請到24人出席，原先有邀請社區組織協會主任何喜華。何曾被視為「梁粉」，又支持CY參選，但其後呼冤，狠批CY話好失望！何喜華同Emily講，今次絕非杯葛飯局，而係有要務在身不能參加，仲話他日CY做政改諮詢，社協一定會提意見。


多名傳媒人出席

至於出席飯局嘅人士係跨黨派跨界別，不過今次無佔中及反佔中組織者，火花應該細啲。但呢次飯局有「梁營」及「唐營」影子，例如周伯展醫生就曾係CY支持者，何鑄明則係唐英年選舉嘅大將。今次人選特色，就係有多名傳媒中人。