葉國謙：譚耀宗係特首人才

【明報專訊】第一大黨民建聯話，目標係2017年能夠派人參選特首，而黨員逾2.3萬嘅民記邊個有能力出選？該黨立法會議員葉國謙噚日接受港台訪問時話，黨主席譚耀宗係人才，可以係人選。譚主席聽後笑咗出嚟，話無諗過呢件事，仲同Emily講笑「如果我諗就話你知啦」。


譚：無諗過

阿謙同Emily話，人哋問佢，前主席曾鈺成、副主席李慧琼及譚耀宗係咪合適人選，曾鈺成就話咗唔選，李慧琼又話未夠資格，人哋再問譚主席係咪人才，唔通自己敢話譚主席唔夠料去選咩？

李慧琼被視為民記培養嘅明日之星，佢話呢頂高帽「太過抬舉」，話自己未夠能力去選。佢認同曾鈺成同譚耀宗係有條件人士，至於曾主席話過唔選，佢講笑咁話，政治一日都嫌長，到時先算啦。