政府承諾唔食翅

【明報專訊】近年社會擺酒宴客，都響應無翅酒席支持環保，噚日政府亦都公布部分外出酬酢餐單指引，講明唔可以食魚翅、藍鰭吞拿魚同髮菜（黑苔），保護瀕危物種。指引仲話，所有公務酬酢活動，要用具有保育意識嘅菜單，活動前要盡量先通知主辦單位配合，同鼓勵政府資助嘅公營機構採取類似安排。


政府今次希望以身作則，用高於《瀕危野生動植物種國際貿易公約》訂定嘅最低要求，為公眾樹立榜樣。不過，因難以將所有引起關注嘅食物盡錄，今次停食3種食物，都算係一個公眾教育開始，日後再留意本地同國際嘅綠色生活趨勢，不時更新菜單。