港鐵大堂多兩把聲

【明報專訊】香港人多車多，交通工具上隨着如RoadShow路訊通等「車廂資訊」出現，港人想耳根清靜有時都幾難。港鐵噚日公布「港鐵開咪」，下周六（28日）起逢周五及周六下午6至7時，喺車站大堂播放直播節目，「試播期」3個月，會由DJ謝茜嘉同朱薰主持，喺港島線、觀塘線、荃灣線同將軍澳線大堂廣播，內容主要有關最新車務資訊。佢哋仲會喺青衣超級車務控制中心內主持節目。


RoadShow推出時，唔少乘客「焗住」喺車廂聽節目及廣告，惹來不少反對，Emily諗，平時搭港鐵等車時已經會聽到好多唔同嘅廣告，加埋大堂呢個節目，咁咪不停被迫收聽節目？港鐵就回應話，節目聲量同現時廣播相若，直播時亦會暫停其他廣告，而且緊急情况下都會交番畀車站控制中心處理，相信唔會騷擾到乘客。