樹根拎住「64」籌

【明報專訊】特首梁振英（CY）噚日去灣仔，但入場券噚日朝頭早已派晒，唔少泛民政黨人士大嘆入唔到場。Emily噚日見到民建聯鍾樹根就問佢點解咁叻拎到飛，樹根無講門票來源，但拎張飛出嚟同Emily呻號碼唔好，「佢畀張六四（064）飛我，我點問問題喎！」而唔敢提問嘅樹根一度閉目養神，唔知係咪諮詢會悶到瞓着呢。


旺角商販「上訪」閉目養神

「釣魚」嘅唔止樹根，會上有個號碼「007」嘅商販代表提問，007話佢來自旺角，但問完問題就合埋眼養神，睇嚟007噚日跨區去灣仔為業界「上訪」應該都幾費神，去到CY答問題時提番起「007」，007聽到自己個號碼先彈番起。


噚日多個副局長亦現身支持，上次都有去觀塘諮詢會嘅副環境局長陸恭蕙（Christine）更畀CY叫上台講解兩句環保政策，Christine就話港府將有多項環保政策出台，會經常煩到大家，佢仲把握機會向CY施壓，爭取增加環保中心，想擴展至18區都有。CY之後就話，廚餘雖可做豬餿，但700萬人嘅廚餘就要7萬隻豬食番，叫大家唔好將希望放喺豬身上，應該將希望放喺人身上，減少廚餘。