商BSD 議員爭住申報有樓

【明報專訊】噚日立法會《印花稅（修訂）條例草案》委員會復會，開會前大家爭住舉手申報利益，好似怕委員會主席李慧琼會漏咗其中一個議員咁。代表地產及建造界嘅經民聯議員石禮謙，除咗話自己有物業外，仲同大家講「我係服務業界人士同香港市民」。


石禮謙申報「服務港人」

石禮謙最近為咗買家印花稅（BSD）同政府搞到好僵，唔知係咪因為怕畀人批評提出嘅修訂偏頗商界，所以噚日趁開會前除咗申報物業，仲要「申報」埋自己係為港人服務。開會時石議員都同運輸及房屋局針鋒相對，仲同大家講自己花咗好多時間寫信畀局方，提出修訂，希望佢哋畀心機睇吓。


不過，唔知係咪最近「利益申報」嚇怕大家，各個議員都爭住話「我有物業」，成個會都係得呢個位最一致，皆因一講到BSD修訂，大家都有唔同表述嘞。