活化廳賣「無篩普選」月餅

【明報專訊】相傳漢人曾經用月餅傳遞信息推翻蒙古人統治，油麻地上海街視藝中心「活化廳」今年就用咗呢條橋，推出「革命」月餅，每個建議捐款價120元，用作活化廳「長期作戰基金」。活化廳月餅最特別嘅係上面印咗「有得揀」3個字，由漫畫家黃照達設計，而餅盒字樣係 「無篩普選」，用意明顯啦。活化廳話，呢款餅係由具廣泛代表性嘅委員會提名選出，會開放畀全民選購，但就只有一款設計！


每個120元 銷情暫一般

活化廳透露，月餅模由上海街雕模師傅操刀，交由小型連鎖餅店龍珠負責製餅，成本價每個50元，整咗300個，只係賣出咗幾十個，會繼續喺「有篩選，無普選」情况下，畀全民選購。活化廳話如果想訂購，可上活化廳facebook填妥網上訂購表格，喺活化廳攞餅，亦可致電3485 6499查詢。另外，佢哋亦舉辦剩食月餅回收，有興趣可以向佢哋了解。