石禮謙變廿四孝公公

【明報專訊】地產及建造界議員石禮謙近日因為修訂政府嘅控樓市「辣招」而曝光率大升，仲由建制派忽然變成「反對派」，石議員噚日同Emily飯局，講解政府辣招時咬牙切齒，但突然電話鈴聲一響，佢一聽，語調即時溫柔起來，原來係細孫女打電話畀佢，小朋友扭緊計要公公買玩具，孫女係公公嘅寶貝，公公梗喺即刻話好啦！

小朋友扭玩具 公公錫晒

石議員手機嘅wallpaper係5歲同3歲孫女嘅合照，佢有幾錫兩粒孫可想而之。佢話開會或同人傾嘢時，一般都避免聽電話，但孫女大晒，打嚟就一定要聽。石議員仲話，細孫女噚日起牀時有啲扭計，媽媽就囡囡，話如果乖嘅話，公公就會買禮物畀佢，咁細孫女梗係記得問公公啦。