夏千福食得sell得

【明報專訊】Emily發現美國駐香港及澳門總領事夏千福唔單止係外交官，仲可以成為傑出推銷員。佢噚日喺港麗酒店出席美國商會午宴時，大讚酒店熱情招待，話不愧為美國品牌嘅傑出代表。佢仲幫香港品牌做宣傳，叫大家學佢咁，去九龍醬園試吓醬油。


讚「同鄉」酒店

夏千福噚日「賣花讚花香」，話自己初抵香港嘅時候就係住喺港麗酒店，用親身經歷證明咗呢間係美國品牌嘅傑出代表喎。


喺午餐會提問環節，夏千福畀台下嘅人稱呼佢為「未來總統先生」，佢聽到之後打咗個突，但就笑住話「呢件係無可能嘅事」。


被叫未來總統 笑住話無可能

夏千福嚟咗香港之後，差唔多每個星期都會去唔同地方吃喝玩樂，體驗地道文化。不過佢話其實喺菠蘿包、醬油同雞批背後，佢見到前國務卿希拉里2011年訪港時講過嘅一段話，「香港仍是連接東西方的橋樑，是一座向四面八方開放的城市」。夏千福話喺香港，各種奇思妙想都轉化為商業活動。


除咗香港，夏千福都會去澳門搵食。上星期佢就去咗澳門食豬扒包，仲喺facebook集思廣益，叫大家繼續推介唔同嘅地方畀佢。搞鬼嘅網民就繼續叫佢去明將食壽司，不過都有人提議佢去廟街食煲仔飯、深井食燒鵝或者襯「秋風起三蛇肥」去食蛇。