人代「帽后」：CY內訪無大用

【明報專訊】特首梁振英（CY）同商界代表團今日出發訪問重慶，踏上佢第10次「內訪」之旅，CY成日話，帶埋工商同專業界訪問內地係要幫商界搵商機，但本身商界出身嘅港區人大代表「帽后」顏寶鈴，噚日批評CY太多內訪，作用唔大。顏太話，商機「CEPA都有啦，使鬼你（CY）做咩！」覺得梁振英一個人「精力有限」，面對各地競爭，應多花時間喺香港長遠發展。


顏太係飛達帽業副主席，佢話投訴營商環境差嘅商界，家多數都係地產商或者係大商家，「中小企反而好少出嚟投訴」，覺得中小企「走位」靈活，未必要政府「內交」幫手。


顏太最近將公司部分生產線移去孟加拉，講到做港區人代，佢話自己喺公司一向係大家姐，好有權威，但喺人大團個個都當佢係新人，叫佢「寶鈴姐」，其實當佢「寶鈴妹」，所以個人都覺得後生咗喎！