前主播黃大鈞被徵婚

【明報專訊】被稱為「新聞王子」嘅已婚前TVB男主播黃大鈞，竟然喺內地徵婚網站徵婚？有眼利網民喺一個內地徵婚網站，發現有一個「黃大鈞」樣嘅人自稱單身，想搵個女伴。不過，呢個「黃大鈞」話自己嚟自「廣東深圳」，所以網民就斷定佢係「山寨版」。


黃：老婆都係笑吓

徵婚網站嘅「黃大鈞」網名叫「男大當婚」，佢唔單止展示好多張黃大鈞嘅單人照，仲話自己係獅子座、35歲，甚至寫埋「當戀人向我提出發生婚前性行為時，我會隨心而行，如果感情很穩定，那麼我不會介意」。


Emily見到呢個徵婚網之後，即刻打畀貨真價實嘅黃大鈞問清楚。現為公關公司老闆嘅大鈞話，都係多得微博嘅網友通知佢，佢先知道自己嘅相被盜用，佢話成件事都係「得啖笑」。


Emily就問佢太太見到之後有咩反應，大鈞話老婆都係笑吓，仲話可能因為佢喺內地唔出名，所以先用佢啲相；又話電影《大丈夫》入面嘅情節都有講日本嘅夜總會都係搵香港名星嘅相去宣傳啦。大鈞話無打算追究，亦唔知點追究個網站。