兩藝展入場費豐儉由人

【明報專訊】10月可以話係香港嘅「藝術季」，因為大家可以同時欣賞本土同外地藝術藏品。今日開始喺灣仔會展舉行嘅典亞藝博（Fine Art Asia）2013展覽，重頭戲包括兩幅油畫﹕畢加索《掛在牆上的吉他》同莫奈《布吉瓦爾的塞納河》。至於喜歡本土藝術品嘅朋友，就可以即日起去香港藝術館欣賞「香港當代藝術獎2012」展覽。


會展有畢加索莫奈

典亞藝博係亞洲唯一匯集東西方藝術藏品嘅博覽會，今年有100間藝廊參與，展出6500件藝術作品。除咗油畫，展品仲包括古董家具、藝術珠寶同古董銀器等。展覽由即日起到10月7號，星期五至日嘅開放時間由上午11點到晚上7點，星期一由上午11點到傍晚6點。成人門票200元，可供兩人進場；全日制學生及60歲以上長者收50元。


藝術館展出本地得獎作

而「香港當代藝術獎2012」會展出97件本地藝術家作品，包括裝置藝術、中國繪畫同攝影等。展覽即日起到明年1月5號，標準入場票10元，全日制學生及60歲以上長者5元。