西九戲棚搬到海濱

【明報專訊】鍾意粵劇嘅朋友又有好節目喇，西九管理局噚日公布嚟緊半年嘅活動，廣受好評嘅《西九大戲棚》將第3度上演，明年1月17號至2月9號舉行。今次係管理局同中國戲劇家協會合辦，除咗10場由本地名伶擔綱嘅粵劇，仲邀請內地梅花獎得獎藝術家演出4場粵劇。由於戲曲中心已經動工，今年《西九大戲棚》會移師西九海濱長廊舉行，市民喺欣賞粵劇嘅同時，仲可以觀賞埋西九勁靚海景。


如果想欣賞音樂，西九管理局12月14號至15號喺西九海濱長廊舉行「自由野」，多達400個本港及海外藝團參與，除咗音樂節目，仲有舞蹈、戲劇等活動。西九海濱長廊亦會喺11月底開始舉辦連串戶外音樂節，包括Clockenflap香港音樂及藝術節2013、Lion Rock Music Festival 2013、JazzMe-HK Festival等，樂迷不能錯過！


此外，M+未來會以「霓虹燈」為主題，明年2月底首次舉辦網上展覽，邀請市民上載最喜愛嘅香港霓虹燈圖片。