饒宗頤12書畫 籌得2800萬

【明報專訊】噚晚香港浸會大學喺會展舉行「饒宗頤國學院籌款晚會」，年近96歲嘅國學大師饒宗頤親自為學院籌款，仲捐咗12幅書畫出嚟做慈善拍賣，總共為浸大嘅饒宗頤國學院籌到2800萬元。全場最高拍賣價嘅畫就係《亭亭出水來 連 行書五言聯》，以530萬賣出，比底價250萬高出一倍有多。


最貴一幅畫530萬賣出

饒公向來關注國學發展，係學貫中西、蜚聲國際嘅漢學家。佢剛剛喺上個月榮任法蘭西學院銘文與美文學院外籍院士，成為亞洲首名獲得此榮銜嘅漢學家。


林鄭致辭 感激墨寶寄語

饒公噚晚精神奕奕出席晚會，致辭時仲好謙虛咁話自己不過係「好渺小」。主禮嘉賓之一嘅政務司長林鄭月娥致辭時，大讚饒公好照顧後輩，仲話自己當年負責將前荔枝角醫院活化為「饒宗頤文化館」時，饒公送咗一幅親筆墨寶《貞固幹事》畀佢，寄語佢「守持正道、堅定不移」。林鄭月娥話做咗司長後就真正明白墨寶嘅意思，所以噚晚一定要出席晚宴支持饒老。