政商名人齊賀中大50年

【明報專訊】噚晚灣仔會展好熱鬧，除咗浸大舉行「饒宗頤國學院籌款晚會」外，中大都喺會展舉行中大50周年「殿堂演藝之夜」籌款晚會，筵開120多席。除咗食物及衛生局長高永文同民政事務局長曾德成等現任高官外，出席者仲有前特首董建華、前律政司長梁愛詩，同埋好耐無見嘅新華社香港分社前副社長張浚生。呢個籌款晚會可以話係政商界名人雲集，衣香鬢影。


阿董張浚生都捧場

Emily問中大校長沈祖堯會唔會上台表演，佢即刻大笑話「唔會啦」，話費事喺咁多位殿堂級嘉賓面前獻醜。問到佢籌款目標幾多，校長就話「梗係愈多愈好」！佢話中大整體一年需要大約1億資金。噚晚入場券最平都要1萬蚊一位，校友半價，Emily粗略估算一下，佢哋噚晚都應該籌到成千萬元。


噚晚高官名人校友雲集，仲有好多精彩表演，包括梅蘭芳之子梅葆玖表演京劇、著名電影演員凌波獻唱黃梅調，粵劇名伶陳寶珠同梅雪詩則同場獻藝。有咁多殿堂級表演，相信大家一定聽得如癡如醉。