淨心退出愛港力核心

【明報專訊】「愛字頭」團體又鬧不和，繼傅振中8月退出愛港之聲後，被稱為「愛港小清新」嘅愛港力召集人陳淨心宣布脫離愛港力「核心」。淨心BB喺facebook話，係因為有部分核心成員產生排外心態，阻礙咗愛港力發展，同愛港力成立嘅宗旨背道而馳，而佢為咗團結更多愛國愛港人士加入「打政棍」行列，決定脫離核心。但淨心BB就無講何謂退出「核心」。


專注「愛國愛港」事

不過，淨心BB嘅粉絲唔使太擔心，因為淨心話將整個人生目標放喺「愛國愛港」嘅事度，團結一切愛國愛港人士力量，仲話要更大力量對付「漢奸走狗賣國賊」。佢又喺fb警告，懷有私心同意圖喺愛港力謀取利益者，立即離開！Emily噚日試過搵淨心BB，但未能聯絡到佢。


愛港之聲會所開幕 無請CY

另一愛字頭組織愛港之聲，星期四會舉行新會所開幕禮，不過主席高達斌話無請中聯辦官員、特首梁振英或者局長級以上官員，佢強調愛港之聲係民間團體，毋須同官員打交道，仲話費事大家friend咗之後，想鬧啲官都難。


問到點睇淨心宣布脫離愛港力核心，高達斌就話人哋嘅家事費事八卦。Emily再問會唔會邀請淨心BB加入愛港之聲，高達斌話要睇吓人哋認唔認同佢哋嘅路線，又指會員都係主動入會，唔使邀請。