理大學生領袖 見騰訊高層

【明報專訊】大學成日都話要培養領袖，理工大學今年推出咗為期兩年嘅「全球青年領袖計劃」，仲喺啱啱過咗嘅暑假同北京大學合作，送咗24個學生去北京同西安上課，行程包括考察農民工作、了解陝西省貧困農村殘疾人士生活，又參觀當地政府部門，同政商界人士，包括全國政協常委伍淑清、騰訊公司管理層等對話，節目幾豐富。理大副校長阮曾媛琪話，希望參加同學可開拓視野、認識國家發展，同埋學習以創新方式解決社會問題。


下年擬赴美會國際領袖

除咗北上，理大仲計劃喺明年底至2015年初，舉辦以「國際關係與全球政治」為題活動，安排學生領袖去美國參觀聯合國辦公室同美國政府部門，甚至與國際領袖對談。Emily真係羡慕呢班學生，但要參加呢個計劃一啲都唔易，要係理大一年級本科生、讀書成績好、夠主動積極先得。理大經過面試篩選，最後選出24個來自香港、內地、台灣、美國、泰國同韓國嘅學生參加。