陳玉峰路過 即拍宣傳片

【明報專訊】佔中發動「普選千金」籌款行動，盼籌得500萬經費，近日就拍咗短片放喺YouTube宣傳。呢分零鐘短片，包括佔中義工陳玉峰粉墨登場，佢話支持佔中係因為佔中有商討嘅環節，大家有機會討論政改方案，佢又呼籲大家捐錢，「多多益善，少少無拘」，十足東華籌款咁。陳玉峰同Emily講，佢當日只係路過拍攝場地，就被人捉咗去講幾句。除咗佢，短片仲有學聯女神何潔泓、作家鄧小樺、傳道人吳國偉等，大家各自講吓支持佔中嘅理由。


第二場名人飯局每位千五

另外，佔中首場名人飯局將於禮拜五喺中環「大班樓」舉行，扣除酒樓費用會全數捐佔中運動，聽聞大班樓相當慷慨，22人晚飯只收萬多元，名額已滿，飯局應該可以籌得約10萬蚊。佔中下月會喺北角「店小二」搞第二場名人飯局，票價每位1500蚊，想報名就要快。