保釣一話出海 海事處出禁令

【明報專訊】經歷4次驗船，保釣船「啟豐二號」終於有望出海！事關海事處噚日朝早再驗船後，船主羅堪就引述海事處人員話，啟豐二號已經按規定完成維修，應該好快攞到驗船紙，佢會向海事處提交文件，申領航行證。佢哋計劃緊可能喺11月出海，去釣魚島宣示主權。


海事處人員噚日除咗視察船頭嘅密封艙，仲去咗頂層做紀錄。羅堪就話，海事處前前後後提出咗50幾項要求，但佢哋已經一一做好，應該好快可以拎到驗船紙。曾經慨嘆啟豐二號「要驗到2047」嘅保釣行動委員會成員曾健成（阿牛），話好不滿海事處次次驗船後都會提出新項目要求「執漏」，質疑係想阻撓保釣船出海。之前保釣船維修，已整好密封艙「龍骨」同氣喉，部分玻璃纖維改為鐵板，粗略估計用咗五六十萬元，係保釣行動過去一年籌得款項嘅大約八成。


原因﹕或違只捕魚規定

不過，保釣即將出海嘅消息噚日一經報道，阿牛噚晚同Emily講，剛接到海事處禁制令，禁制啟豐二號出海，原因係基於9月19日傳媒報道，啟豐二號欲去釣魚島，該處有理由相信船隻會違反只作捕魚用途嘅規定，並且對船員和其他船構成危險。