無電視睇「世界末日喇」

【明報專訊】政府唔批免費電視牌照畀王維基嘅「香港電視」，Emily噚日一打開facebook，差唔多清一色撐港視，除咗40幾萬網民加入撐港視嘅page外，仲有好多網民發揮創意表達佢哋嘅不滿，就連「李香琴」都要出動！

有網民上載番經典港產片、1992年《家有囍事》嘅片段，當中李香琴同關海山兩個老人家因為屋企停電無電視睇，就大吵大鬧話世界末日喇、慘無人道呀咁，有網民話香港人無普選可能都無人理，但無電視睇就好可能暴動。


「希特拉」都發脾氣

另外，有人改咗吳雨霏首《愛是最大權利》做《電視最大權利》，問政府「誰有發牌的勇氣，看着確是無味」，亦有網民改咗「萬能key」《希特拉的最後12夜》片段，話希特拉知道無得睇港視都發晒脾氣。而由於王維基花名叫「魔童」，又有網友搵番動畫《龍珠》橋段，話當中角色「笛子魔童」面對3個敵人，好可能唔夠打，有人話《龍珠》20年前已經參悟到發牌事件。


除咗電影及動畫惡搞版，仲有網民濃縮咗蘇錦樑局長前日記者會內容做1分鐘精華版，當中局長不斷重複講「循序漸進」同「一籃子」。Emily覺得香港人真係好有創意，少個電視台畀佢哋發揮，真係可惜。