蘇錦樑副局無「派片」

【明報專訊】商務及經濟發展局長蘇錦樑（Greg So）終於請到副手，噚日帶埋首日返工副局長梁敬國落立法會大會騷一騷。想當年，Greg So做副局長時因為「騷卡片」一舉成名，點知噚日梁敬國副局長落立法會就無卡片可騷，而第一日返工就遇上電視發牌事件，梁敬國即畀記者圍堵追問，但佢話局長已答提問，無補充。

話未來有意落區

Greg So前日宣布發牌結果記招9說「循序漸進」，噚日早上再連跑兩個電台訪問，雖然聽眾鬧多過讚，但仍無損心情，中午再帶副局長落立法會同傳媒打招呼。Greg So話，有副局幫手做都可以輕鬆，仲透露未來有意落區！不過一眾電視台行家就無咁輕易放過佢，繼續追問香港電視未獲發牌一事，最後搞到二人被圍堵追問。

「葉劉」「陳智思」撐港視？

另外，截止噚晚，facebook專頁「萬人齊撐！！！快發牌比（畀）香港電視！！！」已經有超過40萬個likes，繼噚日「Greg So」like專頁，連「陳智思」、「葉劉淑儀」，與政制及內地事務局政助陳岳鵬同名Ronald Chan都有畀like，不過陳岳鵬同Emily講佢無like呢個page喎。