趙心樹拎論文獎 校友關注發牌多啲

【明報專訊】舊年特首選戰民調提早外泄，被質疑統計上犯「低級錯誤」、終於喺今年初辭任浸大傳理學院院長嘅趙心樹，家喺浸大做緊傳理學院講座教授，該校噚日出稿，佢有份撰寫嘅一篇關於「中介效應」（mediation analysis）論文，獲「權威國際學術期刊」《消費者研究》選為2013年度最佳論文。


呢篇論文由趙心樹聯同兩個分別來自美國科羅拉多大學商學院及夏威夷大學商學院嘅講座教授一齊撰寫，係2010年《消費者研究》特別推薦嘅重點論文，據谷歌學術（Google Scholar）統計，至今被引用600幾次。


曾被質疑犯低級錯誤

篇論文之所以巴閉，係指出咗一個由美國心理學家喺1986年發表、成為最權威嘅中介效應程式，其實易造成錯漏，趙心樹又提出咗新嘅分析程式。趙心樹話對攞獎感到開心，Emily就諗，唔知佢今次咁威可唔可以挽回公眾形象呢。不過，唔少浸大傳理學院校友同Emily講，佢哋比較關心香港電視不獲發牌一事；中大新聞及傳播學院就發咗聲明表達關注，但係就未見浸大嘅意見。