習慣第一 林鄭物理失手

【明報專訊】政務司長林鄭月娥噚日喺港台節目《訴心事家庭》，自爆當年會考成績有3A5B1D，D咗物理。佢話細個時成績一向名列前茅，因為虛榮心作怪，搞到一向鍾情歷史同英國文學嘅佢，會考時都選擇咗讀理科，最終物理得D，「自己對會考成績都有啲意外」。


林鄭月娥噚日應中學師妹、港台DJ鄧藹霖邀請，講吓成長故事。林鄭話，有一次小學中期試因為拎唔到第一而大喊一場，「壓力好多時都係自己畀自己」，加上習慣拎第一，不過自從會考「失手」，佢決定預科讀番喜愛嘅科目，包括歷史同英國文學。最終，佢成為家中第一個大學生，入港大讀社會科學，「喺學校嘅13年（指嘉諾撒聖方濟各書院），建立咗一個核心價值，就係服務大眾」。


師妹爆中學已要做醜人管人

林鄭除咗讀書叻，中學時都係Head Prefect。鄧藹霖噚日都話林鄭細個已經要做醜人管人，家政府有咩難題又係搵林鄭。被形容為「奶媽」嘅林鄭就笑住話：「會堅持繼續服務市民，本住良心做事，做得幾多得幾多。」Emily都希望佢由垃圾到政改都搞得掂啦。