特首高官本周輪流上京

【明報專訊】免費電視牌問題纏繞政府成個星期，即使有萬計市民遊行集會，至今官員都仲未企出嚟具體交代發牌準則。不過，嚟緊呢個星期至少6個高官輪流上京，除咗一般交流同拜訪，唔知佢哋會唔會聽吓中央最新指示，點樣就電視牌一事拆彈？


未知會否晤港澳辦

特首梁振英今晚會帶埋財經事務及庫務局長陳家強、政制及內地事務局長譚志源、特首辦主任邱騰華等一齊上京，明日會出席「北京．香港經濟合作研討洽談會」，會同北京市領導、中央財金官員，以及當地港人等見面，星期四晚返香港。


律政司長袁國強今日亦出發去天津，星期四會轉到北京，同外交部、最高人民檢查院官員會面，又會出席喺北大舉行嘅研討會，星期五返港。而環境局長黃錦星今日亦會即日來回北京，政府新聞處話佢會同國家能源局官員會面，討論能源議題。


政府出稿無講明特首及多個官員會唔會同港澳辦甚至中央領導會面，如最終有見面，希望特首可以開誠布公咁同公眾報告啦。